Овмöдчанiн йылысь юöр

Тимшер посёлоклöн важся нимыс Тимшор. Йöзлöн висьталöм серти, коркö танi овлöма Тимофей нима морт, сылöн оланiн дортiыс визувтлöма шор («шор» – ручей). Шорыс усьö Лунвыв Мылва юö, кöнi и овмöдчöма Тимшер посёлок.

«Тимшер-Тымсер, Эжвалöн шуйга вожын; Кулöмдiн район. Комиöн тым, тымод – «завал», «преграда»; сер, чер, чор «приток». Тымсер – тым чор «приток с завалинами, преградами». Сiдзкö рочнас позьö шуны Тимшер лоö Тымсер. Южная Мылва – Лунвыв Мылва, Эжвалöн шуйга вожыс; Кулöмдiн район. Лунвыв Мылва – «Южная глубокая река», кöнi лунвыв – «южный», «южное направление; ва – «вода», «река»; манси мыл – «мил», хант. мыл – «глубокий»» (А.Л. Афанасьев. «Топонимия Республики Коми»).

Сыктывкарса археологическöй экспедиция серти посёлоклöн мутасыс – тайö важся оланiн. Арлыдыс 2-4 сюрс гöгöр. Йöзыс танi вöравлöмаöсь, кыйсьывлöмаöсь да вотчывлöмаöсь.  Посёлоклöн котыртчан воыс – 1931-öд. Вöлöма сöмын 6-8 барак, а посёлокыслöн нимыс вöлöма «Мыёлдинская механизированная база». 1935-öд воын посёлоклы сетiсны Тимшер ним. 1937-öд воын посёлок лоис пукалысьяслöн лагерöн (12 сюрс гöгöр пукалысь). Лагеръяс сулалiсны: Тимшер юлöн вомлань туйöд 3-öд км участок вылын 7 км сайын Тимшерсянь, Мыёлдинолань туйöд 10 км сайын; 100, 102 участок вылын 15 км асыв-войвывлань посёлоксяньыс. Лагеръяссö вöлi кытшовтöма кузь потшöсöн да на бöрся вöлi сюся видзöдöны. Лагеръясас вöлiны – олан баракъяс, сёянiн да клуб (öти вевт улын), вузасянiн, пöжасянiн, гараж. Пукалысьяс пöрöдлiсны вöр. 1941-öд воын лагерсö бырöдiсны. Сэсся война кадö Тимшерö вайисны переселенечьясöс (выльлаö овмöдчысьяс) Рытыв Украинаысь, Карелияысь да Поволжйеысь.

Переселенечьяс да посёлокса олысьяс заптiны вöр öружие вöчан заводлы, самолёт вöчан промышленностьлы, судно вöчан заводлы да лызьяс вöчöм вылö вöр. Сiдзжö вöр дасьтлiсны кöрт туй вöчöмлы да каръяслы. Уджыс вöлi зэв сьöкыдöн, став уджсö ковмис вöчны ки помысь, инструментъяс пиысь вöлi пила да чер. Вöр петкöдiны вöвъяс отсöгöн. Тылын уджалысьяслысь сьöкыд уджöн олöмсö позьö шуны героическöй уджöн.

Посёлок заводитіс кыптыны 1952-öд воын. Лоисны щита керкаяс. Баракъясысь йöзöс вуджöдалісны. Медводдза уличаяс: Набережная, Карла-Маркса, Ленина. 1953-öд воын Набережная улича вылын воссис начальнöй школа (велöдчанін), сэні велöдчисны 48 велöдчысь. Уджалісны кык велöдысь: Кек Адольф Федорович да Флеммер Антонина Иосифовна. Тимшерын пондіс уджавны медпункт, кöні вöлі амбулатория (бурдöдчанін) да кага чужтан юкöн; вöр заптан кантора; клубын петкöдлісны кино, нуöдлісны гудöк улын рытпукъяс, гажъяс, сьылысь-йöктысьяс дасьтіны концертъяс; пошта; ичöт челядьöс видзанін; вузасянін; вöв видзан карта (600 вöв).

Öнія кадöдз нинöм нин абу кольöма.

1955-öд воын лэптісны аэропорт. 60-öд воясын воссисны нянь пöжаланін да нянь вузаланін. Стрöитісны выль велöдчанін (öнія кага видзанін здание); сёянін, сёян-юан лавка. Кык судтаа велöдчанін кыптіс 70-öд воясö.

1963-öд воын артмисны выль уличаяс: Сöветскöй, öні посёлокын шöр улича. Тайö улича вылас сулалö сельсöвет здание, Коми АССР-са Верховнöй сöветса Президиумлöн индöд серти 1963-öд воын ода-кора тöлысьö 23-öд лунö котыртчис Тимшерса сельсöвет. Медводдза Тимшерса председательнас вöлі Зыкова Галина Андреевна.

1966-1967-öд воясын Сöветскöй улича вылын кыптіс выль клуб, коді öнöдз на гажöдö олысьясöс.

1960-öд воясын олысьяс босьтчисны видзны порсьясöс.

Тимшерсаяс быдтывліны пыш, шабді, картупель, сёркни, свеклö, видзисны гортса пемöс. Вöр пöрöдöмыс вöлі медшöр уджöн.